මේ දැක්වෙන්නෙ පසුගිය දිනෙක මගේ කැමරා ඇස බ්ලොග් අඩවියේ පළ කළ සේයාරුවක්. මේ සේයාරුව මම මගේ කැමරා ඇසට අසුකරගත්තෙ බස් එකේ පා පුවරුවෙ ගමන් කරමින් සිටියදී කියලත් මං ඒ සේයාරුවට යටින් ලියලා තිබ්බා. නමුත් මේක දැක්ක ගමන් ඕගොලන්ටත් හිතෙන්න ඇති මේකෙ නම් කිසිම Motion Blur එකක් නෑනෙ කියලා නේ? අපේ බුධාජීව මලයටත් ඔහොම හිතලා තිබුණානෙ. ඉතිං ඔන්න බුධාජීව මලයයි මායි අතර එතනදි comments වලින් පුංචි කතාබහක් ඇති උනා. ඔය පහතින් දැක්වෙන්නෙ ඒ කතාබහ.

---

බුධාජීව: පට්ට පික් එක ! ෆුට් බෝඩ් එකේ යන ගමං කීවෙ ? ඩයිවර් අංකල්ට බස්සෙක නවත්තන්න කියල, පස්සෙද ගත්තෙ ? පික් එක පොඩ්ඩක්වත් blur වෙලා නෑ නෙ ?

මම: තැන්කූ තැන්කූ! අනේ නෑ පිටිපස්සෙ ෆුට්බෝඩ් එකේ යන ගමන් ගත්තෙ.
Motion blur එකක් එන්නෙ මල්ලි කැමරාවට සාපේක්‍ෂව සහ කැමරාවට ලම්භකව object එක වැඩි වේගෙකින් move වෙනකොට. මෙතනදි කැමරාව නැත්තං බස් එක සහ මුහුදු වෙරළ අතර ඇති දුර වැඩි නිසා කැමරාවට සාපේක්‍ෂව සහ ලම්භකව මුහුදු වෙරළ move වෙන වේගය අඩුයි.
Motion blur එකක් නැතුව ඇත්තෙ ඒකයි.

බුධාජීව: හෆ්ෆා ! ෆොටෝ එකක් ගත්තත් එතන බවු-ටික-විජ්ජාව තියනවා නොවැ !

මම: නැතුව නැතුව... ඔය විජ්ජාව නැති තැනක් නෑ නොවැ... මල්ලි ඔය විජ්ජාව ඉගෙන ගන්නව කියලා දන්න හින්දමයි මං ඔය විජ්ජාවෙන්ම පහදලා දුන්නෙ..

බුධාජීව: හික්ස් !

---

ඔය කතාබහේදි Motion Blur එක ගැන කතා උනාමයි මට මතක් උනේ අපි හොර්ට්න් තැන්නෙ යද්දි උඩරට මැණිකෙ දුම්රිය, බිංගේකට ඇතුල්වෙන දර්ශනයක් ගනිද්දි, ඔය Motion Blur එක නියමෙට සටහන් වෙලා තිබුණනෙ කියලා. පහතින් දැක්වෙන්නෙ අන්න ඒ සේයාරුව. (දැන් මෙය කැමරා ඇස බ්ලොග් සටහනේ පළ කර තිබෙනවා)





ඔය රූපෙ A, B, C කියලා තැන් තුනක් ලකුණු කරලා තියෙන්නෙ ඇයි කියලා දැන් හිතෙනවා ඇති නේද? මට හිතුණා මං බුධාජීව මලයට පැහැදිලි කරපු දේ හරියටම හරිද කියලා ඔය විජ්ජාවම යෙදාගෙන පොඩි විමසුමක් කරලා බලන්න. මොකද අපි ඔය විජ්ජාව ඉගෙන ගෙන තියෙනවනම් අපිට පුළුවන් වෙන්නෙපැයි ඔය ඉගෙන ගත්ත තියරි දැනුම ප්‍රැක්ටිකලි යොදාගන්න. ඉතිං මෙතනින් පස්සෙ සටහන් වෙන දේවල් පොඩි බවු-ටික-විජ්ජා කුප්පියක් වෙන්නත් පුළුවන්. ඔය විජ්ජාව ටිකක් හරි තොල කට ගාලා තියෙන අයට නම් මෙතනින් එහාට ලියවෙන දේවල් හොඳට තේරෙයි. අනිත් අයත් අවධානෙන් කියෙව්වොත් තේරුම්ගන්න බැරිවෙන එකක් නෑ.

යම්කසි දෙයක් පහදගන්න පුළුවන් ලේසිම සහ පහසුම ක්‍රමය රූප සටහනක් මගින් එය විශ්ලේෂණය කරලා බලන එකනෙ. ඔය පහත මම ඇඳලා තියෙන්නෙ ඉහත සේයාරුවෙ ඉහළින් බැලුවොත් පෙනෙන ආකාරය.


මෙතනදි කලු ඊතල වලින් ලකුණු කරලා තියෙන්නෙ දුම්රියට සාපේක්‍ෂව අවට පරිසරයෙ ක්‍ෂණික ප්‍රවේගය. A, B, C තැන් තුනේදිම ඔය ප්‍රවේගෙ නියත නිසා එකම දිගකින් තමයි ඒ ඊතල තුන ඇඳලා තියෙන්නෙ. ඔය තැන් තුන කැමරාවට පෙනෙන දිශාවන් අළු පාට ඉරි වලින් ඇඳලා තියෙනවා.

ඊට පස්සෙ කරලා තියෙන්නෙ අර කලු පාටින් ඇඳපු ඊතල තුන, කැමරාවට පෙනෙන දිශා වලට (කොළ ඊතල) සහ කැමරාවට පෙනෙන දිශා වලට ලම්භක දිශා වලට (රතු ඊතල) විභේදනය කිරීම. ඔන්න ඔහොම විභේදනය කළාම ඔබට පෙනේවි A ස්ථානයේ රතු ඊතලය ඉතා කුඩා බවත්, B ස්ථානයේ ඊට වඩා දිගින් වැඩි බවත්, C ස්ථානයේදි ඊටත් වඩා දිග බවත්.
නැවත වරක් ඉහත සේයාරුව බැලුවොත් ඔබට පෙනේවි A, B, C තැන් තුනේදි සිදුවෙලා තියෙන Motion Blur එකත් A ට වැඩී B, B ට වැඩී C බව. එනම් Motion Blur එක වැඩි වී තිබෙන්නෙ මෙහි රතු ඊතල වල දිග (කැමරාවට සාපේක්‍ෂව සහ කැමරාවට ලම්භකව වස්තුවේ ප්‍රවේග සංරචකය) වැඩිවන විටයි. එනම් මේ සේයාරුව සැලකීමේදී අපේ නිගමනය නිවැරදියි.

මේ සටහනේ මුලින්ම තියෙන සේයාරුව (බස් එකේ යන ගමන් ගත්ත එක) සැලකුවොත්, එහිදී කැමරාවට සාපේක්‍ෂව සහ කැමරාවට ලම්භකව වස්තුවේ ප්‍රවේගය කියන්නෙ බසය ඉදිරියට යන ප්‍රවේගයමයි. (විශාලත්වයෙන්) නමුත් එහිදී සේයාරුව කැමරා ඇසට අසුකරගත්තෙ බසය සැලකිය යුතු වේගයකින් ගමන් කරමින් තිබියදී වුවත් මෙම සේයාරුවේ කිසිම blur වීමක් සිදු වී නෑ. අන්න එතනදි අපේ නිගමනේ පොඩි අඩුපාඩුවක් තිබෙන බව පේනවා.

ඉහත සංවාදය නැවත වරක් කියවලා බැලුවොත් ඔබට පෙනේවි මං කියලා තියෙනවා "මෙතනදි කැමරාව නැත්තං බස් එක සහ මුහුදු වෙරළ අතර ඇති දුර වැඩි නිසා කැමරාවට සාපේක්‍ෂව සහ ලම්භකව මුහුදු වෙරළ move වෙන වේගය අඩුයි" කියලා. නමුත් ආයෙත් කල්පනා කරලා බලද්දි මට තේරුණා බසය සහ වෙරළ අතර දුර වැඩි උනායි කියා එම සාපේක්‍ෂ ප්‍රවේගය අඩු නොවෙන බව. නමුත් මෙහිදි blur නොවීමට නම් ඔය බසය සහ වෙරළ අතර දුර වැඩි වීම හේතුකාරක වෙලා තිබෙන බව නම් ප්‍රායෝගිකව අපිට තේරෙනවා.

පොඩ්ඩක් මෙහෙමත් හිතන්නකො. අපි බස් එකේ යන ගමන් පාර අයිනෙ තියෙන ගස්කොළන් photo එකක් ගත්තොත් හොඳටම blur වෙනවනෙ. නමුත් ඒ වේගෙන්ම බස් එකෙන් යනකොට ඈත තියෙන දුරකතන කුළුණක් වගේ දෙයක් ගත්තොත් blur වෙයිද? නෑනෙ. ඒ කියන්නෙ අපිට හිතන්න පුළුවන් කැමරාව සහ වස්තුව අතර දුර වැඩි වෙනකොට blur වීම අඩුවෙනවා කියලා.

ඒ කියන්නෙ අපිට අවසාන නිගමනේකට එන්න පුළුවන් Natural Motion Blur එකක් ඇතිවීම සඳහා, කැමරාවට සාපේක්‍ෂව සහ කැමරාවට ලම්භකව වස්තුවේ ප්‍රවේග සංරචකය අනුලෝමවත්, කැමරාව සහ වස්තුව අතර ඇති දුර ප්‍රතිලෝමවත් බලපාන බව. දැන් අපි ඕක විජ්ජාවට දාලා බලමුකො.

කැමරාවට සාපේක්‍ෂව සහ කැමරාවට ලම්භකව වස්තුවේ ප්‍රවේග සංරචකය = v ලෙසත්,
කැමරාව සහ වස්තුව අතර ඇති දුර = r ලෙසත් ගමුකො.

මෙන්න අපේ අවසන් නිගමනය. ඡායාරූපකරණයේ දී ඇතිවන ස්වභාවික චලන අවිශදතාවය (Natural Motion Blur) කැමරාවට සාපේක්‍ෂව වස්තුවේ ක්‍ෂණික කෝණික ප්‍රවේගයට අනුලෝමව සමානුපාතික වේ.

ඉහත උදාහරණ ලෙස අප සැලකූ සේයාරූ දෙකටම මෙම නිගමනය නිවැරදි බව මදක් අධ්‍යයනය කළොත් වැටහේවි. බස් එකේ යන ගමන් ගත්ත සේයාරුව blur නොවුනෙ බසයට සාපේක්‍ෂව වෙරළේ ක්‍ෂණික කෝණික ප්‍රාවේගය අඩු නිසා. (එහිදී r ඉතා වැඩි නිසා v/r=ω ඉතා කුඩායි) අනෙක් සේයාරුවේදි blur වීම A ට වැඩී B, B ට වැඩී C ලෙස වී තිබෙන්නෙත් එහිදී කැමරාවට සාපේක්‍ෂව එම එක් එක් ස්ථාන වල ක්‍ෂණික කෝණික ප්‍රවේග A ට වැඩී B, B ට වැඩී C වීම නිසයි. (එහිදි v වැඩි වෙන්න වෙන්න, r අඩු වෙලා තියෙනවා. එනම් v/r=ω එන්න එන්න වැඩි වෙනවා) ඒ කියන්නෙ අපේ අන්තිම last final නිගමනය හරියටම හරි!

එහෙනම් ඔන්න කුප්පිය ඉවරයි. ප්‍රශ්න තියෙනවනම් අහන්න.
෴