ආයුබෝවන්! සුභ අලුත් අවුරුද්දක් වේවා!

ඔන්න අලුත් අවුරුද්දෙ කාලෙකට පස්සෙ බ්ලොග් සටහනක් ලියන්නෙ ඔයාලට අලුත් අවුරුදු තෑග්ගක් දෙන්න. SETT Browser එකෙන් පටන් ගත්තු තෑගි දෙන එක තාමත් නැවතිලා නෑ ඕං. ඉස්සරනං තෑගි දුන‍්නෙ මං තනියම මහන්සි වෙලානෙ. දැන් තෑ‍ගි දෙන්නෙ ම‍ගේ පුංචි සමාගමේ හැමොන්ගෙම දහඩිය මහන්සියෙන්. ඒ බවත් විශේෂයෙන් සඳහන් කරන්න ඕනෙ.

පහුගිය දවස් වලත් ඒ වගේ දීපු තෑගි දෙකක් ගැන මට මේ බ්ලොග් එකේ ලියන්නත් බැරි උනා.‍ කොහොම නමුත් මේ වෙනකොටත් හැමෝම වගේ ඒ තෑගි වලින් ප්‍රයෝජන ගන්න බව නම් දන්නවා. ඒ ගැන බොහොම සතුටුයි.

මේ බ්ලොග් සටහන හරහා මං ඔයාලට කිව්වෙ SETT Browser සිංහල/දෙමළ වෙබ් බ්‍රව්සරය ගැන සහ Bhasha Helakuru ජංගම සිංහල මෘදු-යතුරුපුවරුව ගැන විතරයි. ඊට පස්සෙ අපි එළිදැක්වුවා සිංහලෙන් දෙමළෙන් ඉංග්‍රීසියෙන් තුනෙන්ම ලංකාවෙ නවතම පුවත් කියවන්න පුළුවන් පුවත් කියවනයක්. Bhasha Puvath ලෙසින් මුලින් පුවත් ප්‍රභව 4 කින් එළිදක්වපු එහි 2.0 වන නිකුතුවත් අපි නිකුත් කළා පහුගිය මාසයේ පුවත් ප්‍රභව 30 ක් එක්ක.



ඊට පස්සෙ අපේ 4 වන ඇන්ඩ්‍රොයිඩ් ඇප් එක විදියට Bhasha Viyunu ජංගම බ්ලොග් කියවනයත් නිකුත් කළා. ඒක නම් සිංහල බ්ලොග් ලියන කියවන අපි හැමෝන්ටම සුභ ආරංචියක්. මොකද සිංහල බ්ලොග්කරණයේ ජංගම යුගයේ ඇරඹීම සටහන් වෙනවා අපේ මේ Bhasha Viyunu ඇප් එකත් එක්ක. එහි ‍මීළඟ නිකුතුවෙදි අපි තමන්ට කැමති බ්ලොග් අඩවි පමණක් කියවන්න පුළුවන් වෙන විදියට හදන්නයි ඉන්නෙ. හැමෝම හැ‍ම ‍බ්ලොග් එකක්ම කියවන්නෙ නැති නිසා දත්ත භාවිතය අඩු කරගන්න එය හොඳ උපක්‍රමයක් වේවි.



ඉතිං අද මේ අලුත් අවුරුදු තෑග්ග විදියට අපි ඔබට තිළිණ කරන්නෙ Bhasha Dictionary ජංගම සිංහල-ඉංග්‍රීසි ශබ්දකෝෂය. කොළඹ සරසවියෙ භාෂා තාක්ෂණ පර්යේෂණාගාරය සමඟින් අත්වැලබැඳගෙන තමයි අපි ඔබට මේ තෑග්ග තිළිණ කරන්නෙ.



Bhasha Dictionary කියන්නෙ ඔබේ ඇන්ඩ්‍රොයිඩ් ජංගම දුරකථනය හරහා සිංහල-ඉංග්‍රීසි තේරුම් ලබාගන්න පුළුවන් ජංගම ශබ්දකෝෂයක්. මෙයින් ඔබට සබැඳිව (online) වගේම නොබැඳිව (offline) උනත් සිංහල-ඉංග්‍රීසි වචන පරිවර්තනය කරගන්න පුළුවන්. (ඒ කියන්නෙ මෙය භාවිතා කිරීම අන්තර්ජාලයට සම්බන්ධ වී තිබීම අත්‍යවශ්‍ය නෑ.) හැබැයි ඉංග්‍රීසියෙන් සිංහලට හරවන්න නොබැඳිව පුළුවන් උනත් සිංහලෙන් ඉංග්‍රීසියට හරවන්න නම් සබැඳිව ඉන්න ඕනෙ. ඒ වගේම සබැඳිව පරිවර්තන හොයන කොට ඔබට ඇතැම් වචන වල සිංහල, ඉංග්‍රීසි වගේම දෙමළ පරිවර්තනද ලබාගන්න පුළුවන්.



Bhasha Dictionary හි තවත් විශේෂත්වයක් තමයි ඔබට වචන පැවසීමෙන් වුනත් තේරුම් හොයන්න පුළුවන් වීම. "කියන්න... සොයන්න..." කියලා අපි සඳහන් කරලා තියෙන්නෙ ඒකයි. මෙමඟින් ඔබට පුළුවන් වචන ටයිප් කරන්නවත් වෙලාව නාස්ති නොකර කෙලින්ම වචන පවසලාම තේරුම් හොයාගන්න. හැබැයි මේ "කියන්න... සොයන්න..." ක්‍රියාකාරීත්වය සඳහානම් ඔබේ දුරකථනය අන්තර්ජාලයට සම්බන්ධ වී සිටිය යුතුයි. Wi-Fi මඟින් සබන්ධ වෙන්න පුළුවන්නං මේ ක්‍රියාකාරීත්වයෙන් උපරිම ප්‍රයෝජන ගන්න පුළුවන්වෙයි.

තව දෙයක් තමයි සිංහලෙන් ඉංග්‍රීසියට වචන පරිවර්තනය කරගැනීමේ පහසු‍ව. මේ සඳහා ඔබ සිංහල වචන සිංහල යුනිකේත වලින්ම ටයිප් කරන්න අවශ්‍ය නෑ. ඔබට පුළුවන් සිංග්ලිෂ් වලින් ඔබ සිංහල sms ටයිප් කරන ආකාරයට සිංහල වචන ටයිප් කරන්න. එහෙම සිංග්ලිෂ් වලින් ටයිප් කරන වචන Bhasha Dictionaryය අඳුනගෙන ඔබට එසැණින් ඉංග්‍රීසි පරිවර්තන ලබා දේවි. හැබැයි මේ සඳහාත් අන්තර්ජාලයට සම්බන්ධ වී සිටීම අවශ්‍යයි.

ක්‍රියාකාරීත්වයන්:

• පැවසීමෙන් හෝ ටයිප් කිරීමෙන් ඉංග්‍රීසි -> සිංහල පරිවර්තන ලබාගන්න
• සිංහල යුනිකේත හෝ සිංග්ලිෂ් වලින් ටයිප් කිරීමෙන් සිංහල -> ඉංග්‍රීසි පරිවර්තන ලබාගන්න
• අන්තර්ජාලය නොමැතිව වුවද ඉංග්‍රීසි -> සිංහල පරිවර්තන ලබාගන්න
• අන්තර්ජාලයට සම්බන්ධ වී සිං‍හල -> ඉංග්‍රීසි පරිවර්තන ලබාගන්න
• අන්තර්ජාලයට සමබන්ධ වී ඉංග්‍රීසි වචන වල සිංහල මෙන්ම දෙමළ පරිවර්තනද ලබාගන්න  (ඇතැම් වචන වල පමණක්)
• භාවිතා කරන්නෙ සබැඳි සේවාවද නොබැඳි සේවාවද යන්න ඔබට තීරණය කළ හැක
• ටයිප් කරන සැණින් පෙර සෙවූ වචන යෝජනා ලබාගන්න
• ඔබේ ප්‍රියතම වචන තේරුම් ලැයිස්තුවක් පවත්වාගන්න

තිරදසුන්:






තව දෙයක් කියන්න ඕනෙ. මේ Bhasha Dictionary ඇන්ඩ්‍රොයිඩ් ඇප් එක ගිය වර්ෂයේ අපි සම්මාන හිමි කරගත් Bhasha Dictionary බහු-ආකාර මධ්‍යගත සිංහල-ඉංග්‍රීසි ශබ්දකෝෂයෙ තවත් එක් ආකාරයක්. මේ නිමැයුමට අපිට ගිය වර්ෂයේ ඉ-ස්වාභිමානී ජාතික සම්මානය හිමිකරගන්න හැකියාව ලැබුනා. ‍Bhasha Dictionary හි අනෙක් ආකාරයන් එනම් SMS, Chat සහ Web ඔස්සේද ඔබට මේ Bhasha Dictioanry සේවාවන් ලබාගන්න පුළුවන්. ඒ ගැන වැඩි විස්තර http://dictionary.bhasha.lk වෙබ් අඩවිය ඔස්සේ බලාගන්න පුළුවන්.




Bhasha Dictionary සඳහා වචන පරිවර්තන සපයන්නෙ කොළඹ සරසවියෙ භාෂා තාක්ෂණ පර්යේෂණාගාරය මඟින්. ඒ නිසා වඩාත් නිරවද්‍ය සහ විශ්වාසවන්ත පරිවර්තන ලබාගන්න ඔබට පුළුවන් වේවි. Bhasha Dictionary සේවාව සඳහා වචන පරිවර්තන ලබාදෙමින් අප සමඟ අත්වැලබැඳගත් කොළඹ සරසවියේ භාෂා තාක්ෂණ පර්යේෂණායතනයටත්, වි‍ශේෂයෙන් එහි ප්‍රධානී ආචාර්ය රුවන් වීරසිංහ මහතාටත් මේ අවස්ථාවේ විශේෂය ස්තූතිය පුදකර සිටින්න කැමතියි.

එහෙනං ඔන්න දැන් අලුත් අවුරුදු තෑග්ගෙන ප්‍රයෝජන ගන්න කාලෙ හරි. දැන්ම ගිහින් Google Play වෙතින් මේ අලුත් අවුරුදු තෑග්ග බාගන්න.

ආයුබෝවන්! කාලෙකට පස්සෙ නේද?  හ්ම්... බ්ලොග් එක ලියන්න අතපසු වෙන එක ගැන නම් සෑහෙන්න දුකයි. මොනා කරන්නද ඉතිං, ටික ටික කාර්යබහුල වෙලානෙ.  මෙච්චර කාලෙකට කවදාවත් බ්ලොග් එක ලියන්න අතපසුවෙන එකට හේතුව විදියට කිසිම තැනක 'කාර්යබහුල වීම' කියන කාරණේ කිව්වෙ නැතත් දැන්නං ඒක නොකියාම බැරි වෙලා. මොකද දැන්නං ඇත්තටම එහෙමයි.

කාර්යබුහුල වෙන්න හේතුව කලින් ලිපිය කියවපු අය නම් දන්නවා ඇති. මේ දවස් වල මට කරන්න වෙලා තියෙන්නෙ ද්විත්ව චරිත රංඟනයක් (double acting සීන් එකක් ). එක පැත්තකින් මම තවම අවසන් වසර සරසවි ශිෂ්‍යයෙක්. අනෙක් පැත්තෙන් මං මගේම සමාගමේ අධ්‍යක්ෂක සහ ප්‍රධාන විධායක. ඉතිං ඔය චරිත දෙකටම එකපාර පණ පොවන්න‍ වෙලා තියෙන්නෙ තව මාස 8ක් 9ක් යනකල්. මේ අවුරුද්දෙ නොවැම්බර් මාසෙ තමයි සරසවි ජීවිතේ අවසන් වෙන්නෙ. එතකල් ඉතිං මේ දෙකම සමබරව කරගන්න වෙනවා. මොකද දෙකම ඕනෙනෙ. උපාධිය නිසා සමාගමේ වැඩ නවත්තන්නත් බෑ, සමාගමේ වැඩ නිසා උපාධිය අතඅරින්නත් බෑ. කලින් කියලා තියෙනවනෙ කොච්චර අමාරුවෙන්ද මං මේ සරසවි ජීවිතේට ඇතුළු උනේ කියලා. ඉතිං එච්චර අමාරුවෙන් අත්පත්කරගත්ත දේ අතඅරින්නෙ කොහොමද. ඉතිං ඔන්න ඕකයි හේතුව. මේ වගේ චරිත දෙකක් එකපාර ‍රඟදක්වනවා කියන එක සෑහෙන අභියෝගයක්. හැබැයි ඉතිං කොහොමහරි මේ අභියෝගෙට මූණ දෙන්න වෙනවා. මොකද දෙකම මගේ උවමනාවෙන් බාරගත්තු අභියෝග මිසක් කව්රුත් මං පිට පටවපු අභියෝග නෙමෙයිනෙ. අභියෝග නැති ජීවිතේකුත් ඉතිං වැඩක් නෑනෙ. අභියෝග බාරගන්න තරමට තමයි ඒවා ජය ගන්න පුළුවන් වෙන්නෙ. 

කොහොම නමුත් ඉතිං කොයිතරම් කාර්යබහුල උනත් මගේ කලා ජීවිතේටනම් තවම සමු දීලා නෑ. ඉඩක් ලැබෙන හැම වෙලාවකම සරසවියෙ වගේම සාමාන්‍ය ජීවිතයෙත් කලා කටයුතු වලට දායක වෙනවා තවමත් පුළුපුළුවන් විදියට. මතක ඇතිනෙ ඉතිං එදා ඉඳං මං මගේ බ්ලොග් සටහන හරහාත් දැනුම බෙදාගන්නවට අමතරව මං ගයපු ගීත එහෙමත් ඔබේ රසවින්ඳනයට එක් කරපු බව. ඉතිං අදත් මේ ඉදිරිපත් කරන්නෙ අන්න එහෙම කාලෙකට පස්සෙ මං ගයපු ගීයක්.



මේ ගීතය ගායනා කළේ මීට මාස දෙක තුනකට කලින් ගල්කිස්ස හෝටලයේ පැවති මොරටුව සරසවි පරිගණක විද්‍යා හා මැවිසුරු සංගමයේ වාර්ෂික මහසභා රැස්වීමෙදි. ගීතය ගැන විශේෂ සඳහනක් කළොත්, එදා පැවති උත්සවයේ සිංහල ගීතයකට ගායනා වුනේ රෝහණ බැද්දගේ මහතාගෙ මුල්ගායනක් වන මේ ගීතය විතරයි. ඉතිං ඒ වගේ උත්සව සභාවක සරමක් ඇඳන් සිංහල ජන ගීයක් ගායනා කරන්නට ලැබීම මට නම් සෑහෙන්න ආඩම්බරයක් වුනා. 

ගීතයට අත්වැල් ගායනයෙන් සහය වුනු සජී දේවසුරේන්ද්‍ර, අමිලා පරණවිතාන, නදීශානි හේවගේ, යසිත පණ්ඩිතවත්ත, රජිත් චතුංග, මලිත් ධනුෂ්ක, දිලීප පතිරණ යන සොයුරු සොයුරියන්ටත් සංගීතයෙන් සහය වුනු පියුම් ප්‍රනාන්දු, අමිල මනෝජ්, ශානක කුරුවිට සහ කසුන් පෙරේරා යන සොයුරන්ටත්, විඩියෝ පටිගතකරණයෙන් සහ සංස්කරණයෙන් දායක වුනු පුන්සිරු ලහිරුකුමාර සහ සංජය සූරියආරච්චි ඇතුළු පිරිසටත් විශේෂයෙන් ස්තූති කරන්නත් මෙය අවස්ථාවක් කරගන්න ගමන්ම මේ ගීතය රස විදින්න ඔබටත් ආරාධනා කරනවා. ස්තූතියි! 

ඔබට ජය!
෴
.

ආයුබෝවන්! හැමෝන්ටම සුභම සුභ අලුත් අවුරුද්දක්!

අලුත් අවුරුද්දෙ මුලින්ම මේ කියන්න යන්නෙ මං ගැනම පුංචි තොරතුරුක්. මේ බ්ලොගය ආරම්භයේ පටන් සිටි පාඨකයින්ට මතක ඇති මං මේ බ්ලොගය ඇරඹුවෙ සරසවි ශිෂ්‍යයෙක් ලෙස. නමුත් අද වන විට මම ව්‍යවසායකයෙක්. ඉතිං මං ගැන සහ මවිසින් ආරම්භ කරපු නව සමාගම පිළිබඳ සිංහල ලිපියක් පසුගිය සතියේ 'තරුණයා' ජාතික පුවත්පතේ පළවුනා. මෙම ලිපිය අපේ රටේ ඉන්න නවක ව්‍යවසායකයින්ට දිරියක්ම වෙයි කියලා හිතනවා.

පුවත්පත් සාකච්ඡාව මෙතැන සිට...


ධනික කෞශල්‍ය පෙරේරා නම් වූ මෙම තරුණයා තාරුණ්‍යයේ පසුවන බොහොමයක් තරුණයන්ට ආදර්ශවත් චරිතයක්. මොරටුව විශ්ව විද්‍යාලයේ පරිගණක විද්‍යා හා ඉංජිනේරු අධ්‍යයනාංශයේ අවසන් වසර උපාධි අපේක්ෂකයෙකු වන මොහු අන්තර්ජාලය තුළ ලිවීම්කරණයේද යෙදී සිටී. ධනික මෘදුකාංග නිෂ්පාදනය තුළ මෙරට දී මෙන්ම අන්තර්ජාතික මට්ටමෙන්ද ජයග්‍රහණ මෙන්ම පැසසුම් ලබා ඇත. ගායනයේද සුවිශේෂී හැකියාවක් පෙන්නුම් කරන ධනික මෙවර තරුණයා සමග එක්කර ගනු ලබන්නේ තරුණයෙක් වශයෙන් ඔහු තුළ පවතින්නා වූ සුවිශේෂීතාවන් නිසාමය.

"මගේ ගම පයාගල. මගේ පවුලේ ඉන්නෙ අම්මයි තාත්තයි අක්කලා දෙන්නයි. මම මුලින්ම අධ්‍යාපන කටයුතු හදාරනු ලැබුවේ කළුතර සිරිකුරුස විදුහලෙන්. 1993 වසරේ පාසලට ඇතුළත් වුනු මම 2005 වසරේ පාසලේ ප්‍රධාන ශිෂ්‍යනායක ධූරයද දැරුවා. ඊට අමතරව පාසලේ නාට්‍ය කණ්ඩායමේ, ගායනා කණ්ඩායමේ, බටහිර තූර්ය වාදක කණ්ඩායමේ සාමාජිකයෙක් වුනු මම, උසස් පෙළ කාලයේ පාසලේ ජ්‍යේෂ්ට විද්‍යා සංගමයේ ලේකම් ධූරයද දැරුවා. මේ සියලු බාහිර වැඩකටයුතුත් සමඟ 2006 වසරේ ගණිත අංශයෙන් උසස් පෙළ විභාගයට පෙනී සිට A සම්මාන ‍2 ක් සහ S සම්මානයක් ලබාගන්න සමත් වුණා. නමුත් එයින් මා තේරී පත්වුනේ මොරටුව සරසවියෙ තොරතුරු තාක්ෂණ පීඨයට පමණයි. පොඩි කාලේ ඉඳලා පරිගණක ඉංජිනේරුවෙකු වෙන්න තිබුනු ආසාව නිසාම 2007 වසරේ උසස් පෙළ විභාගයට දෙවෙනි වරටත් පෙනී සිටියා. එහිදී A සම්මාන 1 ක් සහ B සම්මාන 2 ක් හිමිකරගනිමින් කළුතර දිස්ත්‍රික්කයේ 20 වැනියා බවට පත්වීමටත්, මොරටුව සරසවියේ ඉංජිනේරු පීඨයට තේරී පත්වීමටත් මට හැකියාව ලැබුණා.

2008 වසරේ මොරටුව සරසවියේ ඉංජිනේරු පීඨයට ඇතුළත් වුනු මට 2009 වර්ෂයේදී පරිගණක විද්‍යා හා ඉංජිනේරු (CSE) අධ්‍යයනාංශයට තේරී පත්වෙමින් පරිගණක ඉංජිනේරුවෙකු වීම සඳහා මා තුළ තිබූ සිහිනය සැබෑ කරගැනීමේ අඩිතාලම සපයා ගන්නට හැකියාව ලැබුණා. දැනට මා මේ සිටින්නේ මගේ ඒ සිහිනය සැබෑ කරගැනීමේ අවසාන වසරේ. නමුත් මේ අධ්‍යයන කටයුතු සිදුකරන අතරතුරදීම සරසවියේ පැවත්වෙන නාට්‍ය හා ගායනා ප්‍රසංග සඳහාත්, වාර්ෂිකව සංවිධානය කරන නත්තල් බැති ගී ප්‍රසංග සඳහාත් මා නොඅඩුවම දායක වෙනවා."


තාක්ෂණික වශයෙන් නිර්මාණවලට එළඹීම සහ ඒ තුල වෘත්තිය සකසා ගත් ආකාරය පිලිබඳවත් අප ධනිකගෙන් විමසීමක් කළා.

"තාක්ෂණික වශයෙන් නිර්මාණ වලට එළැඹිම ඇරඹෙන්නෙ මගේ උසස් පෙළ කාලයේදීමයි. උසස් පෙළ ව්‍යාපෘතිය ලෙසින් මා නිර්මාණය කළේ 'මානවයා' නම් සිංහල පරිගණක වැඩසටහනක්. මිනිස් සිරුරේ අවයව පද්ධති ගැන සියලුම තොරතුරු රූප සටහන්ද සමඟින් සිංහලෙන් ලබාගත හැකි මෙම නිර්මාණය සඳහා 2007 වර්ෂයේදී මට යොවුන් පරිගණක විද්‍යාඥයා 2007 නම් ජාතික තරඟයේ රිදී සම්මානය හිමි කරගන්නටත් හැකියාව ලැබුණා.

ඉන් අනතුරුව මා සරසවි පැමිනුණු පසුව සරසවියේ තෙවැනි වසරේදි කේවල ව්‍යාපෘතියක් කිරීමට නියමිතව තිබුණා. මෙම කේවල ව්‍යාපෘතිය සඳහාත් මා නිර්මාණය කළේ සිංහල මෘදුකාංගයක්. SETT Browser නම් වූ මෙම මෘදුකාංගය, ඇන්ඩ්‍රොයිඩ් මෙහෙයුම් පද්ධතිය ඇති ජංගම දුරකථන වලින් සිංහල/දෙමළ වෙබ් අඩවි නිවැරදිව කියවිය හැකි ජංගම දුරකථන වෙබ් බ්‍රව්සරයක්. මේ සඳහා 2011 ජූලි මාසයේ ඉන්දියාවේ නව දිල්ලි නුවර පැවති mBillionth නම් දකුණු ආසියානු ජංගම මෘදුකාංග සම්මාන උළලේදී m-Inclusion නම් කාණ්ඩය යටතේ ජයග්‍රාහී සම්මානය දිනා ගන්නටත්, 2011 නොවැම්බර් මස ශ්‍රී ලංකාවේ පැවති ඉ-ස්වාභිමානී නම් ජාතික ඉ-අන්තර්ගත සම්මාන උළලේදී m-Content නම් කාණ්ඩය යටතේ ජයග්‍රාහී සම්මානය දිනා ගන්නටත් මට හැකියාව ලැබුනා.

SETT Browser නිර්මාණය බිහිකිරීමෙන් අනතුරුව 2011 අප්‍රේල් මාසයේදි SETTdeco නම් තවත් නව නිර්මාණයක් මා අතින් බිහිවුනා. එය පරිගණකයේ සිංහල සහය ඇති නැති ඕනෑම අයෙකුට සිංහල වෙබ් අඩවි කියවිය හැකි කරවන වෙබ් සේවාවක්. අද වන විට එය සෑම සිංහල බ්ලොග් අඩවියකම පාහේ භාවිතා වනු දැකගත හැකියි. ඉන් පසුව මා තෙවැනි නව නිර්මාණය ලෙස වෙනස් ආකාරයක සිංහල-ඉංග්‍රීසි ශබ්දකෝෂයක්ද නිර්මාණය කළා.

මේ නිර්මාණ කටයුතු සිදුවූයේ මා සරසවියේ තෙවැනි වසරේ ඉගෙනුම ලබමින් සිටියදී වුවත්, දේශීය භාෂා නිර්මාණ සම්බන්ධයෙන් මා තුළ තිබෙන දැඩි නිර්මාණලෝලී බව නිසා ඒ සඳහාම කැපවුණු ආයතනයක් ආරම්භ කිරීමට ඒ වන විට මට අවශ්‍ය වුනා. 2011 ජූලි මාසයේදි www.bhasha.lk වෙබ් වසම ලියාපදිංචි වන්නේත්, 2011 ඔක්තෝම්බර් මාසයේදී Bhasha Lanka (Private) Limited නමින් සංස්ථාපිත සමාගමක් ලියාපදිංචි වන්නේත් එහි ප්‍රතිඵල වශයෙනුයි.

ඉහතදී සඳහන් කළ නව නිර්මාණ ත්‍රිත්වය Bhasha SETT Browser, Bhasha SETTdeco සහ Bhasha Dictionary ලෙස නාමිකව වෙනස් වන්නේ මෙම සමාගම ඇරඹීමත් සමඟයි. මෙලෙස නාමිකව ‍වෙනස් වුනු නිර්මාණ ත්‍රිත්වයටම 2011 නොවැම්බර් මස පැවති ඉ-ස්වාභිමානී ජාතික ඉ-අන්තර්ගත සම්මාන උ‍ළලේදී ජයග්‍රාහී සම්මාන ත්‍රිත්වයක් හිමි කරගන්නත්, එම සම්මාන උ‍ළලේදී ජයග්‍රාහී සම්මාන වැඩිම ගණනකට හිමිකම් කියමින් වසරේ හොඳම තොරතුරු තාක්ෂණ සමාගම බවට පත්වන්නෙත් අප භාෂා ලංකා සමාගමට හැකියාව ලැබුණා.

මෙම සම්මාන ලැබීමෙන් අනතුරුවත් 2011 වර්ෂයේ දෙසැම්බර් මාසයේදී අප සමාගමෙන් තවත් නව නිර්මාණයක් එළිදක්වනු ලැබුවා. නමින් 'හෙළකුරු' වන එය ජංගම දුරකථනයෙන් සිංහල යතුරු කළ හැකි ප්‍රථම සහ එකම ශබ්දානුකූල මෘදු යතුරුපුවරුව ලෙස හැඳින්විය හැකියි. ‍එයද මේ වන විට සැමගේ ප්‍රශංසාවට ලක් වෙමින් තිබෙනවා.

අද වන විට මම මොරටුව සරසවියෙ අවසන් වසර උපාධිඅපේක්‍ෂකයෙකු වුවත්, මම මගේම සමාගමේ නිර්මාතෘ, ප්‍රධාන විධායක නිලධාරී සහ අධ්‍යක්ෂකද වනවා. සරසවි අධ්‍යාපන කටයුතු නිමා කිරීමටත් පෙර මගේ වෘත්තීය තීරණය වී අවසන්.

මගේ වෘත්තිය තොරතුරු තාක්ෂණය හා බැඳුනත් ඊටත් වඩා මා සතුටු වන්නේ මා ව්‍යවසායකයකු වීම පිළිබඳව. මෙන්න මේ තුළ මා සැබෑවටම දේශපාලනිකව මෙන්ම සමාජයීයවද වෙනසක් සිදු විය යුතු යැයි සිතනවා. අපේ රටේ තවමත් ව්‍යවසායකත්වය පිළිබඳ නිසි පැහැදීමක් නැහැ. පාසැල් සිසුවෙකු හෝ වේවා, සරසවි සිසුවෙකු හෝ වේවා හැමෝම බලාගෙන ඉන්නෙ අධ්‍යාපන කටයතු නිමාකරලා රැකියාවක් හොයාගන්න විතරයි. තමන්ගේම දෙයක් පටන්ගන්න සිතන අය බොහෝම අඩුයි. එයට හේතුව අපේම දේශපාලනික, සමාජයීය සහ සංස්කෘතික බලපෑම්. මෙන්න මේ තත්ත්වය වෙනස් විය යුතුයි.

උපාධිදාරියා යනු සමාජයේ අන් අයට වඩා දැනුමින් පොහොසත් වූවෙක්. අඩුම තරමින් උපාධිදාරියාවත් රැකියා සොයන්නකු නොවී රැකියා තනන්නෙකු විය යුතුයි. දේශපාලනිකව සිදුවිය යුත්තේ අපේ රටේ ආයතන ඇරඹීමට අන් රටවලට ඇරයුම් කිරීමට වඩා අපේ රටේම සිටින ව්‍යවසායකයින්ට අත දී ඔවුන්ව ඔසවා තැබීමත්, අපේ රටේ ජන‍යා තුළ ව්‍යවසායකත්වය පිළිබඳ තිබෙන දුර්මත නැති කරමින් ව්‍යවසායකත්වයට මඟ පෑදිමත් යන කරුණුයි.

තොරතුරු තාක්ෂණ ක්‍ෂේත්‍රය ගත්තොත් ඒ අංශයේ ව්‍යවසායකයින්ට දැනට ලැබෙන සහයෝගය ගැන නම් ඉතාම සතුටුයි.‍ මේ වන විට ICTA ආයතනය මඟින් තොරතුරු තාක්ෂණය සම්බන්ධ එවන් ව්‍යවසායකයින් සඳහා විවිධ විෂයයේ උපදේශනයන් ලබාදීමත්, අලුත බිහිවුණු ආයතන සඳහා මූල්‍ය අරමුදල් සැපයීමත් Spiralation නම් ව්‍යාපෘතියක් හරහා සිදු වෙමින් තිබෙනවා. මෙවන් අතහිත දීම් සෑම ක්‍ෂේත්‍රයකම සිදු විය යුතුයි. ඊටත් වඩා සමාජයෙන් මේ පිළිබඳ ඇති දුර්මත තුරන් විය යුතුයි."


ධනික කලාවටක් ළැදියාවක් දක්වන්නෙක්. වත්මන් කලාව තුළ පවත්නා කඩාවැටීම් තරුණයෙකු ලෙසින් විශ්ලේෂණය කරන්නේ කෙසේද යන්න පිළිබඳව විමසීමක් කළ විට ධනික පවසා සිටියේ,

"වත්මන් කලාව ගැන මට කතා කරන්න පුළුවන් රසිකයයෙක්, ප්‍රේක්‍ෂකයෙක්, ශ්‍රාවකයෙක් සහ පාඨකයෙක් ලෙස පමණයි. මා සිතන හැටියට කලාවේ යම් කඩා වැටීමක් තිබේ නම් ඒ සඳහා මූලිකවම වගකිව යුත්තෙ මාධ්‍ය. මොකද තවමත් හොඳ නිර්මාණ බිහි නොවෙනවා නොවෙයි. නමුත් මාධ්‍ය තුලින් ඒ හොඳ නිර්මාණයන් සමාජගත නොවීම හෝ අඩුවීම නිසාවෙන්, ‍දිනෙන් දින නිර්මාණකරුවන්ද පෙළඹෙන්නෙ මාධ්‍ය තුළින් සමාජගත කරවිය හැකි නිර්මාණ බිහි කිරීමට පමණයි."


වෘත්තීමය ජීවිතයේ ඉදිරි අරමුණු පිළිබඳව ධනික අවසාන වශයෙන් පවසා සිටියා.

"මගේ වෘත්තියට මා තවම පිවිසුනා පමණයි. මගේ සමාගම ආරම්භ කර මාස කීපයක් ඇතුළත ජාත්‍යන්තර සම්මානයක් සහ ‍ජාතික සම්මාන ත්‍රිත්වයක් හිමි වීමෙන් පමණක් මා සාර්ථක යැයි මා සිතන්නේ නෑ. මේ ආරම්භය පමණයි, තව බොහෝ දෑ ඇත්තෙ ඉදිරියටයි.

ඉදිරි අරමුණු ගැන කතා කළොත් මට මගේ සමාගමේ දැක්ම ගැන යම් සඳහනක් කළ යුතුයි. භාෂා ලංකා සමාගමේ දැක්ම "මහජනයා සවිබලගන්වමින්" (Empowering the Masses) යන්නයි. තොරතුරු තාක්ෂණය ගත්තොත් ‍එයින් සිදුවන මූලිකම දෙය ජනයාගෙ ජීවිතය වඩා පහසු කිරීමයි. එහෙමත් නැත්නම් සවිබලගැන්වීමයි. නමුත් ශ්‍රී ලංකාවේ ඉංග්‍රීසි භාෂා සාක්ෂරතාවය ඇත්තේ ජනගහණයෙන් 10% කට පමණයි. ඒ නිසා අප තොරතුරු තාක්ෂණය යොදාගනිමින් කොතරම් මෘදුකාංග නිර්මාණය කළත්, ඒවා ඉංග්‍රීසි භාෂාවෙන් තිබෙන තුරාවට ඒවායින් ප්‍රයෝජන ලබාගත හැක්කෙ ලංකාවේ ජනගහණයෙන් 10% කට පමණයි. එම නිසා මෙම මෘදුකාංග වලින් මහජනයාට වාසි අත්පත්කර දීමට නම්, 100% ක් මහජනයා සවිබලගැන්වීමට නම්, අනිවාර්යයෙන්ම දේශීය භාෂා මෘදුකාංග නිර්මාණය වීම හෝ දැනට තිබෙන මෘදුකාංග දේශීයකරණය වීම සිදු විය යුතුයි. ශ්‍රී ලංකාවේ ප්‍රථම තොරතුරු තාක්ෂණ දේශීයකරණ සමාගම ලෙස භාෂා ලංකා සමාගම මා විසින් ඇරඹුවේ මෙන්න මේ කාරණා ඉටු කිරීම සඳහායි. ඒ අනුව අප විසින් දැනටත් ඉදිරියටත් නව දේශීය භාෂා මෘදුකාංග බිහිකිරීම සහ දැනට තිබෙන මෘදුකාංග දේශීයකරණය සඳහා අවශ්‍ය සේවා සැපයීම සිදුකරනු ලබනවා. මේ අනුව අපගේ ඉදිරි අරමුණ වන්නේ "මහජනයා සවිබලගැන්වීම" යන අපගේ දැක්ම යාථාර්ථයක් බවට පත් කිරීමයි.

‍කෙසේ නමුත් අද වන විට මගේ වෘත්තියේ සහ ජීවි‍තයේ යම් සාර්ථකත්වයක් තිබේ නම් ඊට අතහිත දුන් සැමට තුති පිදීම මගේ යුතුකම වනවා. මගේ පවුලේ සියලුම දෙනාට සහ පාසලේ සහ සරසවියෙ ගුරුවරුන් ආචාර්යවරුන් සැමටත්, සැබෑ ජීවිතයේදී සහ අන්තර්ජාලය හරහා මට අතහිත දුන් නෑ හිත මිතුරන් සැමටත්, සමාගම ආරම්භ කිරීම සඳහා මා හා එක්වුනු චාමික වීරසිංහ සහ ඉෂාරා ප්‍රනාන්දු යන නිළධාරීන්ටත්, අප නව සමාගම සමඟ නොපැකිලව ව්‍යාපාරික සබඳතා ගොඩනඟාගත් Etisalat ආයතනයට සහ LTRL ආයතනයටත් මගේ ස්තූතිය පුද කරනවා."

‍රචින්ත ජයවර්ධන
‍තරුණයා 2011-12-31

------------

මෙම පුවත්පත් සාකච්ඡාව පැවත්වූ අපේ ‍බ්ලොග් අවකාශයේම ඉන්න මිතුරෙක් වන රචින්ත ජයවර්ධන සොයුරාට සහ තරුණයා පුවත්පත ප්‍රකාශයට පත් කරන විජය පුවත්පත් සමාගමට මගේ සහ අප සමාගමේ අවංක ස්තූතිය!

෴

.

ආයුබෝවන්! කාලෙකට පස්සෙ ඔන්න අද මම මේ කියන්න හදන්නෙ තවත් අලුත්ම අලුත් නිර්මාණයක් ගැන. මේ වන විට ජංගම දුරකථන වලින් පහසුවෙන්ම අන්තර්ජාලයේ සිංහල කියවිය හැකි බව ඔබ දන්නවනෙ. අද මම මේ කියන්න යන්නෙ ජංගම දුරකථනයෙන් සිංහල ලිවිය හැකි නව නිර්මාණයක් ගැන. 

මීට මාස 10 කට පමණ කලින් Android මෙහෙයුම් පද්ධතිය සඳහා SETT සිංහල/දෙමළ බ්‍රව්සරය එළිදැක්වීමෙන් පසුව මතුවුනු විශාලතම අඩුපාඩුව තමයි සිංහල කියවන්න පුළුවන් උනත් සිංහලෙන් ලියන්න (යතුරු කරන්න) නොහැකි වීම. මොකද සිංහල වෙබ් අඩවි කියවීම විතරක් නෙමෙයි සිංහලෙන් යතුරු කිරීමත් අපි ගොඩ දෙනෙක්ට තියෙන ලොකු අවශ්‍යතාවයක්. සිංහලෙන් ටයිප් කරන්න විදියක් නැති උනොත් අපිට සිංහලෙන් search කරන්නවත්, සිංහලෙන් බ්ලොග් ලියන්නවත්, facebook එකේ සිංහලෙන් කමෙන්ට්ස් දාන්නවත් විදියක් නැති වෙනවා. 

ඉතිං භාෂා හෙළකුරු නිර්මාණය බිහිවෙන්නෙ ඔන්න ඔය ගැටළු සියල්ලටම පොදු පිළියමක් වශයෙන්. ඒ වගේම දැයේ සහ බසේ අවශ්‍යතාවක් වශයෙන්. හෙළකුරු සිංහල යතුරුපුවරුව සහ සිංහල අකුරු ඇතුළත් කිරීමේ ක්‍රමය (Helakuru Sinhala Keyboard Layout+IME) නිර්මාණ‍ය වෙන්නෙ ඇන්ඩ්‍රොයිඩ් දුරකථනයක ඕනෑම තැනක සිංහලෙන් යතුරු කළ හැකි ලෙසින්. එනම් SETT බ්‍රව්සරයේ විතරක් නෙමෙයි, messages, facebook, twitter, Gmail වැනි ඕනෑම app එකක් තුළ පවා හෙළකුරු භාවිතා කර සිංහලෙන් යතුරු කරන්න පුළුවන්. 

මේ සඳහා භාවිතා වෙන්නෙ ජංගම දුරකථන සඳහා ප්‍රායෝගිකව පහසුතම ආකාරයෙන් සැකසූ ශබ්දානුකූල යතුරු පුවරු සැකැස්මක් (phonetic keyboard layout). මෙම හෙළකුරු යතුරුපුවරුව ජංගම දුරකථන සඳහා වන ප්‍රථම සහ එකම ශබ්දානුකූල සිංහල යතුරුපුවරුව ද වෙනවා.





භාෂා හෙළකුරු යතුරුපුවරුව ලබාගන්නෙ කොහොමද?

1. ඔබේ Android දුරකථනයෙන් Android Market වෙත ගොස් Helakuru සඳහා සොයන්න.
2. Helakuru යතුරුපුවරුව බාගත කරගෙන ස්ථාපනය කරගන්න.
3. Settings > Language & Keyboard වෙත ගොස් Helakuru තෝරන්න.
4. අකුරු ලිවිය යුතු තැන long press කර Input Method තෝරා ඉන්පසු Helakuru තෝරන්න.

ඒත් ඔය යතුරු කරන සිංහල පෙනේවිද?
ඇන්ඩ්‍රොයිඩ් භාවිතා කර තිබෙන හෝ නොතිබෙන ඕනෑම කෙනෙකුට දැන් ඉතිං ඔය ප්‍රශ්නෙ අනිවාර්යෙන් මතුවෙන්න ඇති. මොකද එය තර්කානුකූලයි. ඇන්ඩ්‍රොයිඩ් සඳහා තවමත් සිංහල සහය නැත්නම් අපි මේ ටයිප් කරන සිංහල පේන්න විදියක් නෑ. ඔව් ඒක හරි. ඒත් එහෙමයි කියලා අපිට මුකුත් නොකර ඉන්න බෑනෙ නේද? අන්න ඒ නිසයි ඒ ගැටළුවට හෙළකුරු වෙතින් මෙවැනි පිළියමක් සැපයෙන්නෙ.


හෙළකුරු යතුරුපුවරුව ඔබ කලින් කියූ ආකාරයට ක්‍රියාත්මක කළාට පස්සෙ ඔබට පෙනෙ‍යි ඉහත ආකාරයේ යතුරු පුවරුවක් ඔබ අකුරු ඇතුළත් කරන තැනක් tap කරන හැම විටකදිම දිස්වෙනවා. මේ තමයි හෙළකුරු යතුරුපුවරුව. මෙහි පහළ වම් කෙළවරේ දෙවැනියට ඇති භාෂාව මාරු කරන බොත්තම ඔබා සිංහල සහ ඉංග්‍රීසි භාෂා අතර මාරු වෙන්න පුළුවන්.

මේ බොත්තමෙන් ඔබ සිංහල භාෂාව තේරූ විට ඔබට පෙනෙයි ඉහත රූපයේ ආකාරයට නිල් පැහැති හෙළකුරු පෙරදසුන් තීරුව දිස්වෙනවා. ‍අපි කලින් කතාවුන ගැටළුවට, එහෙමත් නැත්නම් ඇන්ඩ්‍රොයිඩ් මත අපිට සිංහල හරිහැටි නොපෙනීමේ ගැටළුවට පිළියම සැපයෙන්නෙ මෙන්න මේ හෙළකුරු පෙරදසුන් තීරුව හරහායි. ඔබේ දුරකථනයේ සිංහල සහය නොමැති නිසා ඔබ අකුරු ඇතුළත් කරන තැන ඔබ ඇතුළත් කරන සිංහල යුනිකේත අකුරු හරිහැටි නොපෙනුනත්, ඒ ඔබ ඇතුළත් කරන සිංහල අකුරු වලම පෙරදසුනක් ඔබට මේ හෙළකුරු පෙරදසුන් තීරුවෙන් නිවැරදි rendering සහිතවම දැක බලාගන්න පුළුවන්. (එනම් ‍භාෂා හෙළකුරු යතුරුපුවරුව භාවිතා කරන්න ඔබ දුරකථනය root කර තිබීම හෝ සිංහල fonts ස්ථාපනය කර තිබීම කොහෙත්ම අවශ්‍ය වෙන්නෙ නෑ.)



හෙළකුරු යතුරුපුවරුවෙ පහල වම් කෙළවරේම ඇති බොත්තමෙන් ඔබට හෙළකුරු සුචිය වෙත පිවිසෙන්න පුළුවන්. හෙළකුරු යතුරුපුවරුව ශබ්දානුකූල (phonetic) යතුරුපුවරුවක් කියලා කලිනුත් කිව්වනෙ. ඉතිං ඒ ආකාරයෙන් ශබ්දානුකූලව සෑම සිංහල අකුරු සංයෝගයක්ම යතුරු කරන ආකාරය මෙම සුචියෙන් ඔබට බලා ගන්න පුළුවන්. සුචියට පිවිසුනු වහා ඔබට පේන්නෙ අකුරු එකතූන් 5ක්. මේ අකුරු එකතූන් 5න් ඔබට යතුරු කරන ආකාරය දැනගත යතු එකතුව තෝරලා අදාළ දේ පහසුවෙන් සහ ඉකිමණින් ඔබට දැනගන්න පුළුවන් වෙයි.

ඉතිං මේ නව නිර්මාණය අපේ භාෂා ලංකා (පුද්) සමාගමේ 4 ‍වැනි නව නිර්මාණය වෙනවා. පසුගියදා පැවති ඉ-ස්වාභිමානී (e-Swabhimani) ජාතික සම්මාන ප්‍රදානෝත්සවයේදි ජයග්‍රාහී සම්මාන 3ක් හිමි කරගනිමින් අපේ සමාගම වැඩිම සම්මාන ගණනකට හිමිකම් කියූ සමාගම බවට පත්වූ බව ඔබ අතරින් බොහෝ දෙනෙක් දන්නවා ඇති. මීට කලින් අපි එළිදැක්වූ නිර්මාණයන් වන SETT Browser, SETTdeco යුනිකේත විකේතකය සහ Bhasha Dictionary සඳහායි එම ජයග්‍රාහී සම්මාන ත්‍රිත්වය අපිට හිමිවුනේ.




ඉතිං මේ හතරවැනි නව නිර්මාණයත් පෙර නිර්මාණ 3 තරම්ම වැදගත් සහ ප්‍රයෝනවත් නිර්මාණයක් වෙයි කියලා අපි හිතනවා. විශේෂයෙන්ම මෙම නව නිර්මාණයත් ඔබ සැමට සැපයෙන්නෙ සම්පූර්ණයෙන්ම නොමිලේ. 

දැයේ අවශ්‍යතාවයන් සහ බසේ අවශ්‍යතාවයන් වන මෙවැනි නිර්මාණයන් අප ඔබ වෙත ලබාදෙන්නෙ එය අපෙන් රටට සිදුවිය යුතු යුතුකමක් ලෙස සලකලා මිසක් වාණිජ්‍යමය අපේක්ෂාවකින් නෙමෙයි. ඉතිං ඔබේ යුතුකමක් ලෙස මෙම නිර්මාණයන් ගැන රටටම කීමෙනුත්, Android Market හරහා මේ සඳහා ratings එක් කිරීමෙනුත්, හෙළකුරු facebook පිටුව හරහා මෙහි ප්‍රවර්ධනය ‍උදෙසා ඔබේ අදහස් උදහස් බෙදා ගැනීමෙනුත් අපට ඔ‍බේ සහයෝගය ලබා දිය හැකි නම් ඉතා අගෙයි. 



ස්තූතියි! ඔබ‍ට ජය!
෴

ආයුබෝවන්! මේ කියන්න යන්නෙ මගේ ජීවිතේ තවත් එක් ජයග්‍රහණයක් ගැන නම් නෙමෙයි. මේ මගේ ජීවිතේ මෙතෙක් මා ලද සුවිශාලතම ජයග්‍රහණය. මේ වර්ෂය මුලදි මවිසින් නිර්මාණය කර එළිදැක්වූ SETT Browser for Android නම් සිංහල/දෙමළ ‍ජංගම දුරකථන වෙබ් බ්‍රව්සරය පසුගියදා ඉන්දියාවේ නව දිල්ලි හී පැවැත්වුනු mBillionth South Asian Mobile Awards 2011 නම් දකුණු ආසියානු සම්මාන උළලේදී ජාත්‍යන්තර සම්මානයට පාත්‍ර වුනා. මේ ලිපිය ලියැවෙන්නෙ එම ලද ජයග්‍රහණය පිළිබඳව.

ඉන්දියාවේ Digital Empowerment Foundation නම් පදනම මඟින් වාර්ශිකව සංවිධානය කරන මෙම සම්මාන උළෙල සඳහා මෙවර රටවල් 7 කින් නාමයෝජනා 200 ක් ඉදිරිපත් වී තිබුණා. මේ අතුරින් 137 ක් ඉන්දියාවෙන්ද, 19 ක් ශ්‍රී ලංකාවෙන්ද, 16 ක් බංගලාදේශයෙන්ද, පකිස්ථානයෙන් සහ නේපාලයෙන් 6 බැගින්ද, ඇෆ්ගනිස්ථානයෙන් සහ භූතානයෙන් 1 බැගින්ද ලෙස ඉදිරිපත් වී තිබුණා.


මේ අතරින් අවසාන වටයට තේරී පත් වුනේ නාම යෝජනා 52 ක් පමණයි. එම 52 ට ඉන්දියාවෙන් 36 ක් සහ ශ්‍රී ලංකාවෙන් 6 ක් ඇතුලත් වුනා.


මෙම අවසාන 52 අතුරින් ජයග්‍රාහී සම්මානලාභීන් බවට පත් වුනේ නාමයෝජනා 32 ක් පමණයි. මෙම 32 අතර රැ‍ඳෙමින් mBillionth South Asian Mobile Awards 2011 සම්මාන උළෙලේ ජයග්‍රාහී සම්මානලාභියෙකු වන්නට මට හැකියාව ලැබුනා.

ජයග්‍රාහී සම්මානය ලබාගත් පසුව මා විසින් කළ කෙටි කථනය ජාත්‍යන්තර සභාවක් හමුවේ මා විසින් කරන ලද ප්‍රථම කථනය වුනා. ඉතා කෙටි කථනයක් වුවත් එමඟින් ශ්‍රී ලංකාව පිළිබඳ ජාත්‍යන්තරයේ හොඳ ප්‍රතිරූපයක් ගොඩ නඟන්නට සුළුවෙන් හෝ මට හැකියාව ලැබුණා. ඒ පිළිබඳව නම් සෑහෙන්න සතුටුයි.




m-Inclusion නම් කාණ්ඩය යටතේ SETT Browser සඳහා මා ජයග්‍රාහී සම්මානය හිමි කරගනිද්දී m-Infrastructure කාණ්ඩය යටතේ ශ්‍රි ලංකාවේ Etisalat ආයතනය Appzone සඳහාත්, m-Travel & Tourism කාණ්ඩය යටතේ ශ්‍රී ලංකාවේ Mobitel ආයතනය MTicketing සඳහා ජයග්‍රාහී සම්මාන හිමි කරගත්තා.

අවසාන වටයට තේරුණු 52 අතුරින් ශ්‍රී ලංකාවේ Etisalat ආයතනය, Mobite ආයතනය සහ මම ජයග්‍රාහී සම්මාන හිමි කරගනිද්දී, ශ්‍රී ලංකාවේ තරිඳු දසනායක Word Puzzle සඳහා සහ ‍ෆාත්හි මොහොමඩ් Cheer your team සඳහා අවසන්වට (finalist) සම්මාන හිමි කරගත්තා.

මෙම සම්මාන උළෙලට සමගාමීව එදින දවස පුරා පැවති mBillionth Innovation Haat නම් ප්‍රදර්ශනයේදී මාගේ SETT Browser නිර්මාණය පිළිබඳව ලොවටම කියන්නත් මවිසින් ආරම්භ කරන ලද Bhasha Language Services & Solutions ආයතනය නිළ වශයෙන් එළිදක්වන්නත් හැකියාව ලැබුණා.

ඒ අතරවාරයේදී ජාත්‍යන්තර රූපවාහිනී නාලිකාවක් ඉදිරියේ සම්මුඛ සාකච්ඡාවකට පෙනී සිටින්නත් අවස්ථාවක් උදා වුනා. ඒ Mint නම් අන්තර්ජාල රූපවාහිනී නාලිකාව ඉදිරියේයි.


ඉතිං මේ ලැබුණු ජාත්‍යන්තර සම්මානය මගේ ජීවිතේ ලොකුම ලොකු ජයග්‍රහණයක්. රටවල් 7 කින් ඉදිරිපත්වුනු නිර්මාණ 200 ක් අතුරින් ජයග්‍රාහී සම්මානයක් හිමි කරගැනීමත්, ශ්‍රී ලංකාවේ ප්‍රධානතම ජංගම දුරකථන සේවා සැපයුම් ආයතන දෙකක් වන Etisalat සහ Mobitel ආයතන වලට හිමි වුනු සම මට්ටමේ ජයග්‍රාහී සම්මානයක් හිමිකරගැනීමට හැකි වීමත් ගැන සෑහෙන්න සතුටුයි.


ඊටත් වඩා එදින සම්මාන උළෙලේදී ජයග්‍රාහී සම්මාන හිමි කරගත් ලාබාලතම ජයග්‍රාහකයා වන්නත් එකම කේවල ජයග්‍රාහකයා වන්නත් ලැබීම ගැන ගොඩක් සතුටුයි. ඉතිං මේ ජය සතුට සමරන මොහොතේ මගේ දිවි ගමනට අත්වැලක් වුන මගේ දෙමාපිය සොයුරු සොයුරි නෑ හිත මිතුරන් වගේම ඔබ හැමෝටමත් ඉත සිතින් මාගේ ස්තූතිය පුද කරන්න කැමතියි.

ඔබ සැමට ස්තූතියි!


෴
.

ආයුබෝවන්! ඉතිං ඔන්න පුංචි සුභ ආරංචියක් කියන්නයි යන්නෙ. SETTdeco ~ එහෙමත් නැත්නම් SETT යුනිකේත විකේතකය පිළිබඳ මෙවර 2011 ජූනි මස විජය පරිගණක සඟරාවෙ 17 වෙනි පිටුවෙ අලුත් වෙබ් සේවා පිටුවෙ පළ වෙලා තියෙනවා. ඉතිං මේක අපි කාටත් සතුටුදායක ආරංචියක් නේද? ඔන්න බලාගන්නකො විජය පරිගණක සඟරාවෙ පළ වෙලා තියෙන විස්තරය.

ආයුබෝවන්! මීට ටික කලකට කලින් Android දුරකථන සඳහා නිර්මාණය වුනු SETT Browser නම් ජංගම ගවේශකය ගැන ඔබට මතක ඇති. ඒ නිර්මාණ කාර්යය ගැන ප්‍රශංසා කරමින් බොහොදෙනා ප්‍රතිචාර එක්කෙරුවත් හුඟ දෙනෙක් කණගාටු වුනා එහි ක්‍රියාකාරීත්වය අත්හදා බලන්නවත් නොහැකි වීම ගැන. ඒ වෙන මුකුත් නිසා නෙමෙයි, අපි හැමෝගාවම Android දුරකථන නැති නිසා. කොටින්ම කිව්වොත් මං ගාවවත් Android දුරකථනයක් නෑ.

ආයු‍බෝවන්! SETT යුනිකේත විකේතකය ගැන කව්රුත් දන්නවා ඇතිනෙ දැන්. (දන්නැත්තං මේ ලිපිය කියවන්න.) මේ විකේතකය එළිදක්වන මොහෙතෙ එය 100% ක් නිවැරදිව සිංහල පෙළ (text) පෙන්වුවෙ Firefox සහ Safari තුළ පමණයි. නමුත් ඔන්න දැන් මේ විකේතකය Internet Explorer වලත් සාර්ථකව වැඩ!